Bosch Go 第一代電動螺絲批自2018年推出市面後，去到2019年底終於推出第二代，今個月終於嚟到香港，我地五金街全港率先為大家拎到行貨做開箱分享。

【外盒介紹】

今日為大家開箱既Bosch Go第二代，同樣塑膠硬盒，長24厘米闊12.5厘米,高5.5厘米，大細同第一代一樣，膠盒感覺堅挺硬淨，開關雙扣設計，兩代盒可以完美卡好疊上去，居家收納或者外勤攜帶，都非常方便。

打開機盒，操作說明圖印左係盒蓋，看圖識字，操作清楚易明，除左主機外，Bosch Go 2 會連盒附送33個原廠製造既25mm常用批頭，批頭塗上黑色防鏽塗層，更加堅固耐用，批頭本身並無磁力功能，但只要配合附送既60ｍｍ延長桿，即可批頭加上磁力。

拎開間板，慣例一份多國語言說明書，另外一條USB差電線，美中不中既就係無差電器附送，用家可能需要用到自己既手機差電器，底層空間有約莫3cm高度，可以收納各種細碎配件，例如螺絲，絲帽，介子等等。

【機身、外型、性能變化】

Bosch Go 2 長190mm,粗40mm,分別比舊一代長8mm同埋粗2mm,重量大約320克，比起前一代重左20克，但拎上手仍然係非常輕手，佢既防滑膠柄設計非常啜手，手感渣落去相當舒服穩妥，加上尾繩部份改良，手繩部份唔需要好似一代咁拆開就可以裝上，裝上手繩後能夠防止甩手，尾繩配合本身防滑膠柄設計，安全感十足，非常貼心。

Bosch 博世係德國品牌,今次Bosch go 2係馬來西亞製造，電壓3.6伏，轉速每分鐘360圈，官方標準差滿時間需要90分鐘， 我地經測試後約60、70分鐘就差滿電，續航力足以完全應付家用全部需要。

操作方面，Bosch Go 2 三檔開關，分別係正、反以及鎖定。而扭力調整亦經過改良,由一代尾部齒輪設計，改為放係前頭既扭力調節環，十足一般電批既設置，六檔次既扭力環阻力充足，間隔轉動清脆伶落，確保到精確鎖定，施工就更加安心。

【操作施工，啟動模式革新完善】

Bosch Go 系列最大賣點就係推壓式啟動，可以向前，向上或者向下，只要推壓即可啟動，二代保留呢個優點餘再加以完善，佢既推壓式啟動比起一代更加靈敏，輕力一推就即時啟動，同時為左改善拆螺絲時，會遇到推力大過螺絲退力既尷尬問題，Bosch Go 2 新增圓形按鈕用作第二啟動模式，只要一按即可開動，方便用家隨機應變，視乎場景要用唔同操作方式

舉例每當要用到扭力大或者係堅硬物料上施工時，尤其需要時反手，用推壓式啟動就更易發力，如果遇上非常精細既工作，唔敢推壓既時候，例如手機、電路板等維修，圓形按鈕就可以派上用場

Bosch Go 2 另一個賣點就係佢既智慧離合系統，每當扭距去到檔位預設值之後就會自動觸發，停止轉動，同一時間保護批咀、防止螺絲滑牙、節省電力，呢一種設計係家用級工具黎講非常少見，不得不讚.