3M可再用式面罩， 俗稱「豬咀」相信唔少市民會喺裝修、油油、或者喺有唔同氣體污染環境既時侯使用， 如果用嚟預防傳染病， 又work唔work呢? 個面罩又應該點洗? 今集「豬咀全清潔」就為你一一解答！

正常嚟講，一般外科口罩同N95防護口罩， 用過就有機會受到污染，口罩外層有機會黏到人地啲飛沫，內側吸水層就吸晒自己呼氣時嘅濕氣同水分，影響衛生；而3M可再用式面罩， 可以配合P100濾棉使用，P100是美國NIOSH標準的一個等級 ，可過濾油性同非油性粒子達99.97％，有效減少細菌同病毒粒子既危害！

而豬咀受到污染，只要正確咁進行清洗同消毒就可以再用，今日我就教大家點樣清潔呢類3M可再用式面罩。

準備用品有已加洗潔精暖水一盆，已加家用漂白水暖水一盆（1：9），過水用清水兩盆，軟刷，洗手液，廚房紙，膠手套。

豬咀每次用完都要清潔，拆豬咀前第一樣一定係洗手，留意唔好接觸到濾棉表面，拆咗落嚟都要再洗手，然後用紙巾隔住嚟拆濾棉，呢個時候就要戴返對手套，豬咀全清潔主要有2個步驟，分別係清潔同埋消毒！

第一部份清潔，我地準備一盆溝咗洗潔精既暖水，留意返水溫唔好超過49度，將成個豬咀連頭帶一齊浸落去，用軟刷清潔佢既內外，咁就可以清潔埋豬咀啲旯旮細縫位，清潔既作用就係洗走佢表面既油脂污垢，移除病菌既溫床，清潔完就可以過第一次水。

第二部份消毒，我地要一盆1:9稀釋過家用漂白水嘅暖水，都係唔好過49度，再一次將成個豬咀連頭帶一齊浸落去，今次要浸超過1分鐘，安全起見唔好溝其他清潔劑落去，特別係有機溶劑！因為有機會釋出有毒氣體既！夠鐘就再過埋第二次水！

過水記得沖乾淨啲，如果唔係漂白水殘留可能會刺激到皮膚，過完水放係一個冇污染、乾爽嘅地方風乾，一定要等佢乾晒，洗咗手先好將佢入返原裝袋或者保鮮袋。

咁就完成整個清潔豬咀嘅程序喇，成個過程最重要就係洗手，每次掂豬咀之前之後，都要洗一次，確保啲病菌唔會經手走去豬咀到或者走去個人到。

濾罐／濾棉清潔

講完豬咀，同大家講一講濾棉同濾罐喇！呢類型有外殼表面既濾罐濾棉就可以用1：9稀釋嘅家用漂白劑消毒1分鐘或者用70％以上嘅酒精抹佢嘅外殼表面，洗手，再入保鮮袋，千祈唔好入水、唔好水洗、唔好用噴壺噴！佢一入水個濾罐唔可以重用架喇，而且水份亦有機會令到病菌滋生！ 不過留意返，呢個清潔方法只能夠清到濾罐嘅表面， 如果懷疑濾罐受病毒細菌污染， 最好唔好再使用。而p100濾棉其實同口罩一樣係即棄，佢係唔濕得水冇得清潔架！

溫馨提示，豬咀同部分N95防護口罩係有呼氣閥， 呼氣閥的作用是降低呼氣阻力。一般健康人士為咗預防病毒而佩戴口罩係冇問題既；但如果懷疑自己已經被感染，就唔應該戴豬咀或者有呼氣閥既口罩，如果唔係就起唔到保護其他人既目的。

重溫一次，豬咀加濾棉可以減少細菌和病毒粒子危害，預防飛沫傳染病
豬咀清潔可重用，用1：9稀釋過家用漂白水嘅室溫水，千萬唔好用有機溶劑同酸性清潔劑。濾棉同濾罐懷疑有細菌污染就唔可以用，濾罐外殼可用酒精抹，但濾棉唔可抹，冇得清潔，要即棄。

最後再提提大家，成個消毒程序一定要做足做啱先確保到乾淨衛生，除此之外，無論係口罩定豬咀，最緊要啱臉型，戴得啱同埋個口罩完好無缺，防止病菌係條罅到入晒去，如果唔係用最好最靚嘅filter都冇用！