全城閉關，唯有打機解悶，但玩玩下部Switch個Joy-Con飄移好易玩到燥，特別係玩動物森友會因為飄移而打唔中鐵礦石！你有無遇過以上情況呢？今日可怡子就花幾分鐘教大家點樣幫個Joy-Con復活喇！

1. 檢查

係救機之前先做個快速檢查，首先打開Switch，去「校正操控搖桿設定」上下左右轉下個Joy-Con，如果你發現郁完之後圓點係對唔返十字中間位，就代表你部機已經變左做AE86，既然確診咗有飄移問題，我地就即刻開始拯救行動！

2. 清潔劑

清潔嘅關鍵就係揀啱清潔劑，Switch始終係電子野，如果用錯咗，部機就隨時打柴，所以我地要用返市面上嘅精密電器清潔噴劑去做清潔。

呢類型清潔劑專門針對清潔電子用品，除咗遊戲機之外，屋企電腦、影印機、碟機等等都適用，清潔劑可以去除污漬灰塵，夠安全之餘唔導電，而且快乾唔留痕，今時今日咁高科技嘅時代，屋企放定一支看門口真係隨時都啱用。

3. 清潔

清潔之前，記得先關機，然後將控制器拆出，等佢冷卻後再開始清潔。

冷卻之後，用噴管插入防塵蓋裡面，然後噴少少入去，再轉幾個圈，之後等佢乾同揮發就搞掂。表面噴多咗嘅清潔噴劑，可以用布或者紙巾抹返走。如果唔小心噴咗落手，記得快啲洗手，想最安全嘅的話可以戴住手套去做清潔。

4. 檢查

清潔完就可以去返「校正操控搖桿設定」設定畫面再測試一下，就會發現已經唔會再飄移，咁就可以繼續打機喇～